Panton Cinta |Cukop Gura|

                   Pengarang: Cek Wandy

Kawe raya, mata lipeh
Eumpeun meuceh, nibak mata,
Kawe kadra, jimeulanggeh
Kawe bileh, seu-iet raya

Putoh mata, jikap ileh
Eumpeun abeh, sigoe taga
Hana cara, ngon si gadeh
Suwah aleh, nibak janda

Cukop gura, ladom gadeh
Ka meucureh, kabeh luka
Malam jula, kuwak binteh
Publoe kuweh, meusoe hawa

Meunan cara, keubit paleh
Rap rap abeh, mandum rata
Tanyoe muda, korban payeh
Salah pileh, lam mon tuha

Taeu dara, tupat meudeh
Lage gareh, runong mangga
Sang ie saka, hantroh ireh
Jijep habeh, ie ie sira

Pajan teuka, tupue abeh
Wate taeh, malam jula
Hana rasa, 'oh ji langgeh
Lage binteh, tan jendela

Dari pada, hate seudeh
Bah ta aleh, balek cara
Walau janda, tan le gadeh
Kadeuh meuceh, bukti nyata

Yang bahaya, keubit jaèh
Umpang tireh, tanpa duga
Daripada, meunoe meudeh
Ulon pileh, mawa janda

Seunang teuka, walau seudeh
Han meucureh, jantong dada
Hana dawa, umpang tireh
Gantoe gaseh, dalam cinta

ladom dara, mita gaseh
pileh pileh, ureung kaya
yang jihawa, ata lam kéh
meunyo kabeh, putoh cinta

macam cara, tanyoe dikréh
ji meu abeh, beutroh cita
rayu jiba, ngon peungaseh
di seumbeuleh, beu beulanja

bantroh cita, nyan sigadeh
gantoe gaseh, laen cinta
ureung kaya, target pileh
 yang teubai kèh, dijak mita

cukop gura, wahai wareh
keubit jaéh, 'oh ta kira
gara gara, pike gadeh
badan lipeh, seungkak dada

'Oh noe rika, ulon tuleh
Kisah kabeh, lam calitra
Meuah dara, mandum gadeh
Nyo meulanggeh, salah haba

Bek na gata, teuka seudeh
Yang lon tuleh, gura gura
Bak lon kira, dara gadeh
Mantong lam gleh, ngon mahkota

PANTON ACEH ||DAWA LAM PANTON ||

Cek Wandy

       °°MITA LAWAN°°

Sianeuk tamban, jigrop-grop lambong
Aneuk kikirong, jigrop meuputa
Lon mita lawan, di dlm panton
Nyan kreuh kikitong, bagah neuteuka

Mubek troh datang, yang leumoh jantong
Yang meu ie hidong, hana ku hawa
Yang raya badan, meuheut di ulon
Diateuh panggong, ulon preh gata

Gata lon undang, lam peusan panton
Langkah neuhayon, keunoe neu teuka
Jurus lam reugam, pukulan sudong
Aci neupeutron, pakiban rupa

Yang garang-garang, darah jièk trôn
Galak di ulon, ureung yang kha-kha
'Oh nan lon layang, haba dile phon
Dawa lam panton, meutre teunaga





~LAWAN TROEH TEUKA~

Zulfahmi Bin Mustafa

Bak bineh pante riyeuk meugulong,
meu suson-suson seureutak banja,
hanpue neukawe aneuk kikirong,
teutap di kunjong jak balah haba,

'oh ban katuha geukheun ôn geureusong,
wate ijoe ôn pisang geu nama,
nyoepat loen katrôh u wateuh panggong,
ngoen soe teuma phon adu tenaga



Hana Sabohna

Gata cek wandy leupah that umbong,
bak anek kikirong peuleumah teuga,
bak ulon tuan bek peuleumah umbong,
sigo ku sinthong keudeh lam paya



Acek Aan

Cukop that su'um lon baca panton,
kupue di jak umbong bak aneuk kadra,
pakon han bak long dada peubusong,
sigo kulambong lam bakat raya

Hai cek wandy yang raya umbong,
nyoho katroh long jak layan gata,
pue na beuho dada peubusong,
meunyo deungon lon kutantang sigra




Armia Mia

siraja rimba sideh dalam gle,
si raja pade dalam blang raya,
meunyoe ngon gata bukon lawan long,
kusipak bak punggong kutrom bak muka.

Cek Wandy

Sideh dipasi..bakat meu alon,
Bakat jièk trõn..beurawang teuka,
Sunggoh beurani..keunoe neukunjong,
Teukijot langsong..lon kalön gata,

Wahai Zulfahmi..yg katroh kunjong,
Neupeugah bak long..ilmee digata,
Pue ka miliki..di dalam jantong,
Sehingga katrôn..jak balah haba,

Pue na kong gaki..gata rakan long,
Pue keuh kikitong..na meu göh guda,
Lawan bang Fahmi..pemuda arong,
Diateuh panggong..seureng juara,

Pike keulayi..yoh goh gata trôn,
Aci neuhitong..ilme di gata,
Kutakot nanti..terjadi langsong,
Goh troh u panggong..ka pingsan teuka,

Si cicem dama..di kuchet punggong,
Teukijot lutong..teungoh meutafa,
Hana Sabohna..sayang opolong,
Ka geutoh umbong..broh broh kuala,

Lawan sang hana..gata dg long,
Neujak woe langsong..bak asai mula,
Jurus pruh hama..han lagot bak long,
Jurus pruh racon..ka awot masa,

Jurus yg kana..gata lam jantong,
Kajameun dilong..ka èk kubaca,
Yoh goh meurana..gata rakan long,
U ateuh panggong..bek coba coba.

Jigrop meutimphan..ciriek boh jantong,
Ditop bak punggong..le ma kucuka,
Di Acek Aan..nyan ban geukunjong,
Kontak sang langsong..teuglong ngon mata,

Meuah hai kawan..lawan ulon hôi,
Kon lon toh umbong..di dalam haba,
Meuheut lon tuan..lawan lam panggong,
Siaran langsong..lam tivi kaca,

Tapi hai rakan..gata beumuphom,
Bayi meu ekdom..lon anggap gata,
Bek kajak lawan..di ateuh panggong,
lawan di ulon..kon tingkat gata.

Siraja macan..dalam gle bundong,
Siraja tiyong..lam gle peudada,
Tan lam pikiran..lawan troh kunjong,
Gata bek umbong..Armia Mia

Jurus sitohang..meubayang ujong,
Goh sang diulong..takot jiteuka,
Jurus meulambang..meucap bak gudong,
Ka kayem di long..meu uji coba,

Surot beurijang..hai Armia long,
Jak lop lam sarong..u dalam rimba,
Bek jak ci lawan..di ateuh panggong,
Ek cebreh langsong..nyo lawan gata.




Zulfahmi Bin Mustafa

Aneuk kikirong lam ie beurawang,
Aneuk seumilang bak mieng Kuala,
Nyoepat Cek Wandy katroh Loen datang,
Deungoen tujuan jak balah haba.

Bunoe neu tanyoeng bak uloen tuan,
Pue tra nasajan jurus uloen ba,
Teuma oh jinoe loen bri jawapan,
Seribu bayang jurus loen buka,

Deungoen jurus nyoe han pue meu'ayang,
Ngoen kekuatan hebat leumpahna,
Dak bacut keunoeng langsong jeut pitam,
Seakan-akan terjadi geumpa,

Oh lheuh nyan kubèt kupangke badan,
Cek wandy sayang Hana le daya,
Kumat bak jaroe gaki ngoen tangan,
Kuhapit rijang keudeh uluwa,

Cek wandy talo di uloen meunang,
Ilmee loen tuan Hana bandeng sa,
Sinoe Keuh akhe dum pergaduhan,
Sampoe loen tuan diangkat Raja




Arjuna

Di dalam cintra di meusu tiyong teukeujót lutóng di sampeng rusa
meuah cek wandi teulat ulon trèn
sebab di ulon bunoe keurija

lon deung keu juri mnteng di ulong
meusoe keuh kawom yg beut piala
ulon tentukan nilai lon hitong
si bungóng dusón lon bi juara

ureung jieh tari tamse ban iembon
puteuh meu alon ceudah that rupa
lom pih jih kaya keturunan ampon
nyan keuh hai kawom lon jók piala

soe-soe yg talo lam blang ku lambóng
sajan keureungkóng ulon geulawa
ku kham bak igoe ku puwoe u gampong
kusie bak punggong ngon pempeng kaca

mangat ji rasa bek raya umbóng
dijieh ta peu lhon bak jalan raya
tacok gapeuh culók lam hidóng
ngon cangkoi burong tapeh bak muka

nyankeuh praturan yang ulon sinthóng
yang leumoh jantong meubek neu teka
ku takót euntreuk di ateuh panggóng
gata rakan lon ka tan na haba

Cek Wandy

Jimusu gôt-gót..ateuh bak pisang,
Teukijot rijang..rimueng meutafa,
Hana kusurot..gata troh datang,
Siap lon hadang..fahmi Mustafa

Jurus meubalot..meuputie karang,
Jurus ceumeucang..tan mupat punca,
Hana kutakot..jurus keupalang,
Seribu bayang..hana kukira,

Mandua tu'ót..kupeukong rijang,
lage busoe tang..aturan kuda,
Walau rot likot..ulon ka seurang,
Golom sang goyang..di dalam dada,

Kumat bak janggot..kutayang-tanyang,
Jurus kupulang..ngon tapak dewa,
Keudeh kusangkot..ka nibak labang,
peugot keu tiyang..replang jendela,

Adak ka kawot..lake bantuan,
Hana troh datang..hana pue coba,
Beungoh ngon supot..kubi pukulan,
Hana balasan..meu ube cupa,

Sigoe ka su'ot..haba lon tuan,
Abah ku hantam..abeh teunaga,
Man saboh balot..gigoe sang goyang,
Man saboh karang..teusuet uluwa,

Adak ka kheun chop..sira ka ang-ang,
Teutap ku sumbang..pukulan naga,
Ule sang ku khop..kupeulop sikhan,
Ngat na buktian..seubagoe tanda




Djamal Gulero

deungon bismillah langkah ile phon
seugolom kujong ileumee teuka
hoeka keuh gata sahabat ulon
tamong lam jantong peukong angota

nyoe kon cilet-cilet lawan ikeu long meunoroet umbong si raja dewa
aleh pieh keuh nyoe aleh pieh keuh hoem
citree sahbat long jurus tabuka

bek jurus mawöt ile tapeutron
takoet di ulon kon lawan gata
tabuka fisik langkah meuhayoen peugerak mandum jeut-jeut anggota

peudeung lam jaroe bahle lam sarong lon tes ile phon deugoen teunaga
wahee Cek Wandy cipeurab langsong
nyoe pat kana lon ka di keu mata

mubek neusuroet limbot ija krong
menyoe yoe jantong hoi tgk Zhazha 
lake bantuan seureuta tulong
Yoh golom jantong kusuet uluwa


Arjuna

Weh sinan mandum syedara
bek rhot lam lampaya ku lawien aki
ku takót euntreuk keunong bak muka
payah u Banda neujak obati

Dari bunoe segolom 'isya
gata syedara ulon peurati
meumacam jurus keunan ka neuba
meumacam haba kalheuh neurawi

Ka dari bunoe lon kalon mata
hana trók teuka si ferdi edi
han meupat copy panton dineuk ba
payah takhem haha untuk si ferdi 

teuma jinoe lon neuk ceurita
bak syedara bak mandum akhi
hana lê jurus yang diri lon ba
tók sabóh saja jurus yang lon bi

kèn jurus lutong kèn jurus kuda
kèn chiet syedara jurus keubiri
tapi jurus nyoe yang diri lon ba
keubit syedara leumpah that ngeri

oh tee lon suet teukijot mata
han neu peucaya man-man dum akhi
ken jurus rimueng atawa rusa
tapi syedara peugadoh diri

watee neu neuk sóh tubóh tiada
oh ban lon puta ka gadeuh aki
lheuh nyan ku trom mndum syedara
ku lambóng sigra yang bak keumiki

mandum kahabeh rawi lon puta
yang côk juara ulon sendiri
han kubi mat meu sidroe hamba
kubalót ija pasoe lam mari

óh noe keu habeh mndum ceurita
teusèt mata mandum saudari
piala ceudah yang cantek rupa
Arjuna Dealova pasoe lam mari




Zhazha Arrival

Dicong bak panah na cicem buroeng
Dicong bak sukoen na cicem pala
Meunyoe nyan lawan meubek neuhoi loen
Sigoe loen hayoen teusuet aneuk mata

meunyoe nyan jurus meubek teukaboe
ngoen bg Djamal Gulero cit ka meumada
mubek neuharap neuyak lawan lon karna di uloen koen lawan gata

beuthat beu taeu pijuet badan loen
tapi hai kawon ureung leumpah kha
Nyoe han neupateh lage loen susoen
Meubek salah loen oh ka ceulaka.




Arjuna

Hana lon pateh yang gata rawi
teuce'ek gaki gata hai Zhazha
ulon nyoe jurus penghilang diri
kiban kaneuk bi jurus di gata

han deuh kaeu long óh jurus kabi
kalawien aki hana meumada
dum pue jurus ka keluari
chit hana arti wahe syedara

óh kusuet jurus lon payah sangak gusi
uyup bak punti kah ku geulawa
ku chóp bak abah dg peulinti
kutak ngen paci dikah bak muka

nyo mnteng na su kutakat lagi
langsong ngon besi ku culók mata
ku ték tèk langsóng dikah ngen paci
ku bagi-bagi tubôh anggota

on punyueng kujók nibak keibiri
teuma di gaki kujók keu rusa
mata ku yue côh bak mirah pati
teuma keudidi kujók uram pha

ka habèh mandum gata hai Zhazha
ka tamat haba yg ka tarawi
taklik meu i'i sira tagisa
tijóh ie mata sampoe u gaki

soe na laen yg meuheut teuka
neujak ju sigra wahe è akhi
seugolom habeh tamat beurita
bagah neuteuka soe yang beurani




Djamal Gulero

jalan kuta blang hai Arjuna jinoe kaluwah
deungoe goeb peugah meunan beurita
meunyoe nyan jurus beh pue tapeuhah
leumiek that langkah lon lawan gata

atra lam balum jinoe lon ruwah
nak teuhah babah kakalon rupa
nyoe keuh rangkang kuala jithei ka meugah
golom na seujarah taloe hai syara

ci ju peugadoh droe rakan meutuwah jitupat ilah rangkang kuala
jitu'oh poh walou tan jeulah
ji tupat seulah walau tan gamba

 jitupat kutuk ulei neuh beukah
oeh roe darah baro neurasa
dalam bayangan gata di rupah
gigoe jipeuhah jantong jimita

hideh bak jantong ka jimeu olah
pruet neuh bicah jisut uluwa
ngon paru-paru bandua jiplah
jantong ji cahcah marèh di cula

walau kamate han jipeusudah
seugolom darah thoe bak aggota
nyan ban jurus jile kupeuhah
eunteuk kutambah jurus yang kha-kha




Djamal Gulero

Zhazha Arrival  droeneuh bek goyang,
hõi putroe di baroeh ju keunoe



Zhazha Arrival

Hamboe ju nyoe nyan lawan payah lon puasa ile meusigoe minggu



Arjuna

Geurehem naga lon pike reudôk,
padahai peulandók pakat meurawi,
meunyoe nyan jurus cuma ubeók
sigoe ku tawók payah kembali,

penghilang diri jurus keurók - rók,
ka takat han trók óh kabeut gaki,
44 bóh bayang lam tawók,
kiban ka keutók hana katuri,

karna jurus lon tamselan reudók
han katupat trók dak kapeurati
tamselan awan kaneuk mat hantrók
angen aduen èk hanjeut taputie,

rangkang kuala aneuk manyak budôk
barò ku batók dikliek meu 'i-'i
uroe nyan kalheuh yoh masa di lhôk
ku inchók-inchoók jurus keudidi,

luka di badan durôh deungon ók
dijih ku antók bak sagoe mari
jurus rider dudoe ku tawók
jantong ku tusôk ngon peudeung sakti

ji beu'et langkah ngon meusók-meusok,
ngen jurus mabók ku geurtak lagi,
diplueng sep bagah silop tan jisók,
oh lheuh jurus trôk penghilang diri,

rab sabóh donya langkah lon peutrók
jurus keu rók-ròk han pat di uji
satria manteng di cap teulunjók
Rambo di anggók di beu'èt jari



Djamal Gulero

jalan lhok sukon umantang kuli
jalan u idi jinoe ube oek
hoka gata jen peugikut pari
keunoe ta ilie jaroe lon kawoet

nyoepat sang lawan yg ka ta nanti
meunuroet taeu hie sang payah hantok
44 macam bayangan riti
cuba kacari thoeh yg pelancok

toeh keuh saboh bayangan asli
beudoeh hai pari taseutoet beutroeh
rangkang kuala ka iboet jari
dijih ka ji 'i-'i bacut jitumbok

kabalah dendam siat hai pari
bek rugoe lon bi beulanja lon jok
bek rugoe mantong awan kahuni
nyan biok duri han ek ka unchok

oke lah Djamal ji suot pari
meunyoe nyan-nyan hie lawan neujak jok
jinoe lon peupoe u langet tinggi
hideh kugiti sampe duroeh oek

44 bayangan mandum ku cari
mandum hadapi sampe u pucok
lon rubah droe 77 warni
nak bek jituri le lawan budok

sigoe itam lon ubah diri
sigoe-goe lagi kuneng lon tarok
wareuna ijo pieh lon warnai
ban 77 lagi mandum kutarok




Arjuna

Pham phúm lam pangkee,
bak tubee lam dawa,
hoka gata bóh kumbee,
nyo pat kee dalam guha,

dilanget reudôk pangkee,
seutèt alee yang teuh warna,
jen pari raya ulee,
cók èk asee bóh lam tima,

yang di glè ikat ulee,
lam juree bude kana,
ho teuh rambo taseuót kee,
di kah palee nyankeuh beuna,

kah keudidi pakat cagee,
cangguek puree pakat satria,
power ranger berubah dilee,
angkót batee kah cèm pala,

nyo kasiap angôk ulee,
mangat jithee soe Arjuna,
Di jèn pari singèt ulee,
han meuhó see gadèh warna,

langsông di plueng keuoe sajan kee
miyup ulee di klik meu a' a
1000 ampon laju di lakee
ji deung blah kee jinoe teuma

kiban Djamal pue mantong guree,
ba sajan kee bagah ju sigra,
mangat sigoe ku antók ulee,
mangat seudee mandum seureuta.

Cek Wandy

Kuala cangkoi meugah cukop lhok,
Walou ube-0k hantrok dong gaki,
Asai ka neuhoi ulon laju trok,
Walau lam sibok teutap lon ili,

Meu macam jurus keunoe kabeh trok,
Rap-rap meu antok ule Cek Wandy,
Jurus bg Djamal pideung sipucok,
Lam sarong meusok keubit that ngeri

Zhazha Arrival jurus si bidok,
Meuhayon kudok angen jimeusie,
Sigo dihayon laju meutumpok,
Jiteubiet batok saket TeBeCi,

Jurus Arjuna keubit that sudok,
Jurus keuròk-rók penghilag diri,
Bayang 4 macam kiban ta antok,
Kiban ta kutok supaya rasi

Meumacam jurus kadeuh meutumpok,
Sahoe sang hantroh 'oh kupeurati,
Jurus hana deuh binti keuròk-rók,
Sigoe geureutok ngon jurus cek wandy,

Sitapak dewa teunaga reudok,
Sigoe bit kujok teubati-bati,
Badan sang ijo meukulek kudok,
Leumbam dalam brok jantong ngon hati,

Sijurus pideung bideung ube-ok,
Kiban ji tawok luwah si inci,
Ngon jurus jameun kupeutheun inchok,
Jitop jitusok hana deuh meuri,

Jitak bak badan dicang bak kudok,
Na pue ji antok badan long besi,
Meucumeh pih tan dalam deungon lhok,
Rugoe neu tumbok hana meu arti,

Jurus meuhayon ku anggap biok,
Sigolom jijok ka beukah bibi,
Ngon jurus kikitong kupulang inchok,
Ule meu anggok sang-sang ilusi,

Jurus bin jurus ubena yg trok,
Kuanggap biok bé uke gaki,
Mandum kutangkih dalam sigoe rok,
Sigoe ku antok rusok meusundi,

Pue hana laen jurus rakan eok,
Yang kreuk bak tampok anti spasi,
Soal piala cap naga bidok,
goh na meusoe thok nibak cek wandy.




Djamal Gulero

katroeh bak jen pari pue lom?
last nyan eok.




Arjuna

Tham thum kurcaci
ula ili tapak dewa
kikitóng payah lari
cek wandy payah gisa

tum he muhobati
jurus hindi jinoe lon ba
beurangkahó lheuh meu uji
di beut jari mandum rata

anggók ulee pak bupati
khèt-khét gaki óh deuh rupa
ulon gabóng penghilang diri
cukóp ngeri 1000 rupa

mandum ji plueng payah lari
pasukan besi dong meubanja
meusoe beuhè langkah gaki
sige giti bereutóh anggota

jinoe piala na lam mari
kalón gunci ngon salaba
pasukan jaga teugóh gaki
hanjeut ungki meusidroe hamba

cangguek puree di liket mari
teuma keudidi sampeng satria
teuma di rambo i liket kurcaci
teuma jen pari jaga di luwa

meunyoe cagee ngon mirah pati
di pagar besi pengon cem pala
habeuh lengkap pasukan meuriti
soe beuhö hati langkah ju sigra

dum obama ka di cap jari
Si Djamal lagi payah di gisa
payah peu ubat droe jinoe cek wandy
jurus kurcaci keunong bak muka




Djamal Gulero

jen pari atra lon bunoe nyan hai




Arjuna

Ka i dèng blah long lagoe bunoe,,!!
Cie neu baca le begeut inoe beh??

Pham phúm lam pangkee,
bak tubee lam dawa,
hoka gata bóh kumbee,
nyo pat kee dalam guha,

dilanget reudôk pangkee,
seutèt alee yang tõh warna,
jen pari raya ulee,
cók èk asee bóh lam tima,

yang di glè ikat ulee,
lam juree bude kana,
ho teuh rambo taseót kee,
di kah palee yg keuh beuna,

kah keudidi pakat cagee,
cangguek puree pakat satria,
power ranger berubah dilee,
angkót batee kah cèm pala,

nyo kasiap angôk ulee,
mangat jithee soe Arjuna,
Di jèn pari singèt ulee,
han meuhó see gadoh wareuna,

langsông di plueng keunoe sajan kee
miyup ulee di klik meu a' a
1000 ampon laju di lakee
ji deung blang kee jinoe teuma

kiban Djamal pue mnteng guree,
ba sajan kee bagah ju sigra,
mangat sigoe ku antók ulee,,
mangat seudee mandum seureuta.

Nyan neu eu kên, ka idong blah lon jen pari..??




Djamal Gulero

man ilong hoe lon jak lom..¿¿




Arjuna

Droe neuh kataló,,!! Neujak yang bak seukee ile siat,, Dang-dang trók awak laen,,!! khak




Zulfahmi Bin Mustafa

Bek dile neu eh wahe e rakan,
Seribu bayang baro troh teuka,
Bunoe koen teunget loen rehat badan,
Dengoen tujuan peusep teunaga,

Rimueng lam uteun cukop that garang,
Gajah ditantang ngoen dua Mata,
Meunan cit diloen surot that pantang,
Walau neuhadang ngoen jurus naga,

Teutap jurus loen seribu bayang,
Ngoen kecepatan luar biasa,
Bek dile naga singa loen cin-cang,
Dak saboh kawan loen kira hana,

Meunyoe Cek Wandy enteng that lawan,
Bagi loen tuan goh lom sebrapa,
Goh abeh jurus kusuet lam badan,
Sigoe ku tendang ka meukilah pha,

Kumat bak gaki kupeh disinan,
Teuma oh lheuh nyan takue kuputa,
Hana le Ampoen nibak Loen tuan,
Bek bunoe Rakan cangklak that gata,

Jinoe kucok le kubet di sinan,
U wateuh rangkang kupeuduek teuma,
Lheuh Nyan ku ikat ban Saboh badan,
Dak geumeulawan tan le teunaga,

Teuma oh lheuh nyan ku asah Parang,
Yang paleng tajam meu blet-blet mata,
Dengoen makeusud badan di gobnyan,
Loen neuk pisahkan dengoen kepala,

Oh no keuh abeh kisah loen tuan,
Seribu bayang ngoen jurus naga,
Sabe dinaga hana tom meunang,
Seribu bayang sabe juara.




Arjuna

Buróng punjót dalam juree
kajak bak kee siat gata
kaseutõt siat yg raya ulee
keunoe ka pangkee Fahmi mustafa

ka kupeurati dari phôn dilee
dijih jithee raya haba
kiban keuh dicók piala batee
sedangkan bak kee kunci salaba

kupue cek wandy yang dijih pangkee
sedangkan bak kee nyompat piala
that get di jaga ka oleh cagee
di rhóm ngon batee soe yang trók teuka

jèn pari pih saban lagee
peungen cagee dan cem pala
leumpah that jai anggota di kee
anggók ulee kepala tentra

meunye beuhè jak beu teunte
yang bèk lagee Fahmi mustafa
peugah haba sang-sang gure
padahai ulee salóp lam ija

Cek Wandy

Mirah pati, itam ukee
Aneuk cagee, itam mata
Hai Zulfahmi, beuna malee
Bek kalake, dikah juara

Soal meunang, golom teunte
Bek meugese, peugah haba
Jeh Arjuna, lawan dilee
Aci pangke, kiban cara

Pasukan jih, ungkong bate
Kreuh that ule, han pue coba
Meuyoe di jih, ek ka pangkee
Lawan ngon kee, laju gata

Ateuh panggong, beumeuteunte
Ta tre dilee, meusoe teuga
Kadag gata, payah gese
Awai seude, buet arjuna.

 Cek Wandy

Soe keuh pemenang, teuma hai jinoe
ateuh panggog nyoe, soe cok juara
Kalheuh bertarung, mulai bunoe
Na yang payah moe, saket dum luka




Zulfahmi Bin Mustafa

Hana lom mesoe hai Cek Wandy,
Bak loen peurati mandum teuga,
Teuma yang lum0eh nyan keuh si Fahmi,
Han ek hadapi lawan that teuga,

Tinggai saboh treuk lawan cek wandy,
Nyan keuh jen pari atra Arjuna,
Meunyoe ek neupoh  nyan loen cap jari,
Nyan keuh cek wandy yang cok juara.

 Cek Wandy

Riyeuk bicah, bineh pasi
Sigoe ili, rawang teuka
Lon meugalah, wahe fahmi
Angkat jari, duwa duwa

Takot leumpah, di cek wandy
Keu jen pari, takot raya
Cukop juwah, dijen pari
Warna warni, bayang teuka

Mate langkah, han pue taci
Ngon jen pari, han pue coba
Yoh goh teulah, di cek wandy
Duwa jari, lon bôt sigra

Piala meugah, kasah bukti
Kajeut tabi, keu arjuna
Teuhah babah, di bang fahmi
Djamal lagi, met met hana




Arjuna

Assalamu'alaikom,, rakan ahli
dong meuriti,, teupat banja
yg dilikèt,, bek nyuè gaki
nyóe kugiti,, baró karasa

seungap mandum,, suasana sunyi
beugot peurati,, bek salah haba
jurus keu rôk-rok,, penghilang diri
tambah jen pari,, leubeh teunaga

yang cók juara,, bak malam ini
saya sendiri,, Arjuna dealova
juara keudua,, jôk keu c'wandy
Teuma si Fahmi,, juara tiga

Djamal Gulero,, ke peut ulon bi
Keulimong pasti,, kujok keu zhazha
yang paleng keu chót,, Si Ferdi edi
Hana troh ili,, adu teunaga

Memada 'oh no,, haba lam rawi
laen keulayi,, tasambóng haba
Arjuna dealova,, senang that hati
ngen jurus hindi,, reubôt piala

Panton Cinta | Janji Sulet |

Lutong kurap, loncat buket
Sigoe jipet, katroh teuka
Get that geupap, janji sulet
Lam sigoe blet, laen haba

Janji ucap, dalam raket
Ateuh buket, ucap cinta
Tanpa seubab, ka meupalet
Cinta kaèt, putoh duwa

Pakôn meuhat, haba meuhet
Janji yoh trep, tipu daya
Yoh phon pakat, cinta kaét
Wate katrep, gata bungka

Yoh nyan teupat, janji gaét,
Taék raket, tanyoe duwa,
Lheuh nyan leugat, janji neuwet
Kisah palet, gantoe punca

Lam sikijap, kameu supet
Cukop saket, dalam dada,
Dalam surat, haba sulet
Ulon neulet, deungon nuga

Asoe surat, titek hansep,
Kaneu titep, kureung kata
Kiban meuhat, surat tilep,
Hana udep, kata-kata

Keubit gawat, bin ajaêb
Cinta raéb, siklep mata
Cuma siat, bak lon hudep,
Batre hansep, abeh pulsa

Dalam bakat, eungkot kawet,
Peudeuh sirep, cincu mata,
Haba singkat, dalam baét
Nyan peunyaket, dalam cinta

Yang pah ubat, tabi beusep
Mangat teupet, duwa mata
Baigon kurap, nyan tayue jep
Tayue titep, bak teu tangga

Ngat jitupat, rumoh saket
Mangat ngon phet, cici rasa
Meunan meuhat, janji sulet

Get that saket, nyo takira

'Oh nan meuhat, ulon raket
Janji sulet, kabeh rika
Nyoe na silap, haba saket
Meuah beusep, ulon pinta

Ca'e sahbat, that meuwet-wet
Neuk miet ciret, maklum saja
Lapan urat, ka lon kaét
Meunyoe jahet, teugor sapa.

Karya: Cek Wandy

Si Dara Cebong

Cagee meulawak, jikuprak jidong
  Deungon si ungkong, tan na meuturi
Ka Jiboh beudak, merek di hongkong
Kalage keông, si hama padi,

Contoh lon hayak, meunan lon peudong
Si dara cebong, kisah lam rawi
Na beok lagak, be bola pimpong
Ji teuka sombong, be bola poli

Hoe-hoe yang dijak, hana di dong-dong
Hana di kalon, kanan ngon kiri
Yang meunan lagak, geulupak teugom
  ka lage kingkong, 'oh ta kalon hi

Ngon rakan inong, jimeungon han tom,
 Nyan keuh ban sombong, meuteu'óh tari
 Dum deungon inong, meunan ta kalon
 Ngon agam pue lom, hana pue jak ci

Dara lage nyan, peurangui kingkong
Mubek neukalon, deungon peurati
Bah keuh disinan, jidueuk ngon jidong
Meu dang-dang reuton, meunurot dali

Meunan keuh dile, kisah ulon rhom
Si dara cebong, di dalam rawi
Meuah lon lake, nyo salah teugon
Butoi deungon kon, meuah beuneubi

Panton Aceh | Nasehat | Putoh Cinta |

Putoh duwa, taloe lipah
Sambong bagah, taloe rante
Putoh cinta, mubek susah
Bek na gundah, dalam hate

Laen dara, mita bagah
Dara ceudah, keubit oke
Saboh mala, siploh tambah
Lam peupatah, meunan sabe

Dalam dada, mubek susah
Mubek teulah, cewek tan le
Laen dara, rame leumpah
Aci olah, pedekate

Peugah haba, bak phon kisah
Lembut abah, nariet hate
Neubi kata, yang that indah
Mangat bagah, di kap kawe

Eumpeun neuba, eugkot mirah
Biok neuplah, mata kawe,
Kiban cara, hanjeut peugah
Pulang kisah, aci pike

Meunyoe cara, ulon peugah
Teuhah abah, cewek matre
Abeh dara, neuba kisah
Keu lon jatah, sapue tan le

Dari pada, ulon teulah
Han jeut peugah, cara kawe,
Kiban cara, untuk olah
Nyan teu serah, kata hate

Contoh guda, seu-iet leumpah
Becak jigah, angkot pade
Meu-en bola, aneuk gajah
Kiban kisah, seu'iet kon le

Meunan cara, ulon peugah
Dalam kisah, lon boh tamse
Dum si guda, deungon gajah
Ji meu ngalah, juwah tan le

Nyan si dara, kon lon peugah
Carong olah, kana hase
Jurus neuba, bek yang salah
Sigoe neuhah, jikheun oke,

'Oh nan haba, dalam kisah
Ulon peugah, dalam caê
Nyo na kata, haba salah
Meuah bagah, dalam hate

Karya: Cek Wandy

MABOK

Aneuk jampok, pajoh abèë
Aneuk cagèë, pajoh sira
Ureung mabok, saboh lagèë
Saket ulèë, seungkak dada

Mabok gelek, singet ulèë
Mabok sabèë, sayu mata
Mabok cewek, saket ulèë
Hana ta thèë, putoh cinta

Mabok ganja, laen lagèë
Ngon bak kayèë, peugah haba
Mabok tuba, salah sangkèë
Mabok tubèë, salah sangka

Mabok wiski, ie lam ulèë
Geureu-op bèë, mutah teuka
Mabok judi, macam lagèë
Lam bak kayèë, jimeu tafa

Mabok arak, krak lam ulèë
Mabok batèë, peh-peh meja
Mabok tuak, kuprak singkèë
Abah mubèë, lagèë paya

Mabok ubat, mumang ulèë
Resep keudèë, awot masa
Mabok silat, takat gurèë
'Oh geu singkèë, blek-blek mata

Mabok keupeng, kaheng ulèë
Ôn si ribèë, beujeut juta
Mabok kaleng, sebeng keudèë
Bit-bit seudèë, meunan cara

Mabok kawen, laen lagèë
Dalam ulèë, pajan pesta
Mabok kayem, khem-khem dilèë
Dang-dang seudèë, saket jiwa

Mabok carlsberg, sangkot ulèë
Rasa malèë, dalam mata
Mabok tiger, gura lagèë
Singet ulèë, peugah haba

Mabok harta, baba metèë

Ta peu gesèë, nibak tanda

Mabok janda, gura lagèë

Sa duwa lhèë, sigoë hila

Ji meu hayon, haba tipèë

Ek ji pangkèë, mawa - mawa

Mabok racon, badan layèë

Han trep watèë, rubah teuka

Macam mabok, ka lon rangkèë
Abeh lagèë, 'oh takira
Teusuet batok, bak ta karèë
Na can kèë-kèë, mabok teuka

Kasep 'et noë, mabok dilèë
Laen watèë, sambong haba
Meu'ah jinoë, ulon lakèë
Nibak gurèë, tuha muda

Nibak rakan, saban lagèë
Ulon lakèë, meuah desya
Kadang-kadang, teupeh ulèë
Caê sabèë, ka lon puta

Hana maksut, lon seumalèë
Dalam rungkèë, panceng haba
Nyang lon meuheut, meuneuk bri thèë
Bek le lalèë, mabok saja

Keu hiburan, karang ritèë

Suntok ulèë, woë keurija

Bek keuh rakan, neu dam watèë

’Oh neu ngieng kèë, peuhu mata

       Karya: Cek Wandy
   


Bek Teuwô Baca;
• Panton Cinta / Cukop Gura
• Panton Cinta / Janji Sulet
• Dawa Lam Panton
• Si Dara Cebong
• Putoh Cinta
• Mabok
• Ingat Keu Tuhan
• Saleum Keu Rakan

SALEUM MEUTURI NGON RAKAN MANDUM

Kiban rakan, pue haba uroe nyoe ..??

INGAT KEU TUHAN

Assalamu'alaikum, saleum lam rampoe
Tanda lon pakoe, rakan syedara
Ulon bi saleum, mandum beusigoe
Si beurangkaso, meusoe yang baca

Bacut lon karang, kisah lam rampoe
 Pakhok lon ungkhoe, dari oe keu a
Ingat keu tuhan, judul lon pasoe
Meunyoe keu asoe, nasehat lon ba

Cem pala ek pam, manyang that jipoe
Ji pok-pok jaroe, lam awan mega
Jipakat lawan, ngon ma kumotoe
Meusoe teuga poe, jeut cok juara

Teu ingat jih tan, wate ban jipoe
'Oh rot meutampoe, baro jirasa
Meunan tamselan, contoh lon pasoe
Neupike keudroe, wahe syedara

Peureule parang, 'oh koh bak panjoe
Sibok mita goe, bak utoh bara
Ingat keu tuhan, 'oh wate seungkoe
Dua blah jaroe, do'a ta pinta

'Oh saket badan, su'um ngon asoe
Bak tuhan sidroe, ta lake teuga
'Oh puleh badan, ka mangat asoe
Keu tuhan sidroe, teuwoe bin lupa

Pajan chiet pajan, teu ingat sigoe
'Oh ka meupaloe, deungon binasa
Baro teubayang, keu tuhan sidroe
Malam ngon uroe, taroe ie mata

Contoh di ureung, ulon kheun sidroe
Di dalam nanggroe, peugot usaha
Geu sewa neuheun, udeung geupasoe
Muloh ngon sungkoe, na geupeulara

Tiep-tiep peut beuleun, geu panen sigoe
Hasil geu publoe, meureumpok laba
Muloh ngon udeung, yum jibloe kiloe
Sigoe geu publoe, laba meujuta

'Oh geu peutren yum, modal geu pasoe
Pena bak jaroe, kira keumira
Keu sewa neuheun, geu kira sigoe
Bayeu seuleusoe, teunaga kerja

Habeh geu hitung, pangkai geu pasoe
Tinggai lam jaroe, mandum keu laba
'Oh ban geu bileung, ngon kalkulatoe
Laba lam jaroe, troh siploh juta

Sambong-meunyambong, udeung geupasoe
Sampe troh sampoe, panen jiteuka
Raseuki neuheun, lagenyan bagoe
Sampe troh peut goe, meutai-tai laba

Keuneuleuh neuheun, nibak limong goe
Kehendak bak poe, ie raya teuka
Beureutoh ateung, neuheun peut sagoe
Udeung ngon sungkoe, ka ie raya ba

Ureung poe neuheun, meungamok sidroe
Kata yang kutoe, jitubiet sigra
Langsong ju geu kheun, kabeh dum rugoe
Rap saboh moto, merek avanza

Geu duek bak ateung, geu leung ngon jaroe
Bak tuhan sidroe, do'a geu pinta
Do'a yang geu kheun, sunggoh meu awoe
Pulang ju keu poe, tuhan yang esa

Lagenyan neuheun, han ek kupakoe
Han ek ku hiroe, dalam ie raya
Han ek le kutueng, lagenyan bagoe
Bah jinoe kuwoe, urumoh gisa

Kisah meu neuheun, ureung nyan bagoe
Bit keubit paloe, lagenyan cara,
'Oh panen udeung, mandum ka teuwoe
Keu tuhan sidroe, malah ka lupa

Jakeut geu peutheun, deungon geu iem droe
Hana geupakoe, yang gasien papa
Aneuk yatim dum, rata jeut sagoe
Tan na meusigoe, seudeukah geuba

Yang na tupue kheun, 'oh neuheun buchoe
Neubi allah poe, bek troh ie raya
Nyo panen udeung, hana deuh sahoe
Seungap teu iem droe, hana troh haba

Meunan peukateun, wahai aduen droe
Mubek na sidroe, yang ikot cara
Geutanyoe mandum, udep lam nanggroe
Allah sidroe poe, yang mat kuasa

Ingat keu tuhan, rakan sinaroe
Malam ngon uroe, bek sagai lupa
Teumpat singgahan, sinoe lam nanggroe
Mandum teuh tawoe, u alam baqa

Beuna amalan, keu pangkai tawoe
Ta peu siap droe, wate ta gisa
Nyo tan amalan, keubit that rugoe
Baro phon tawoe, ka keunong nuga

'Oh noe hai rakan, kisah lam rampoe
Bah laen uroe, ta sambong haba
Meuah lon tuan, nyo salah asoe
Kadang meu gawoe, bak tuleh rika.

Karya: Cek Wandy

SALEUM KEU RAKAN

Assamu'alaikum, saleum mulaan
Keu mandum rakan, muda ngon mudi
Adoe ngon aduen, kumuen ngon bisan
Saleum sapaan, rata ulon bi

Ban peut penjuru, saleum kenalan
Inong ngon agam, saleum meuturi
Barat ngon timu, baroh seulatan
Saleum keu rakan, ngon ikhlah hati

Saleum loen tuju, rata kawasan
Deungon harapan, silaturrahmi
Mandum loen saweu, wahe e rakan
wareh ngon taulan, saleum uloen bi

Rôt kaca layeu, loen kirem pesan
Meuah hai rakan, bek neuweuh hati
Bek neukheun sapeu, keu uloen tuwan
Maklum hai rakan, jioh posisi

Meuyoe na umu, geubi le tuhan
Ta usahakan, bagah meuturi
Langsong deuh taeu, ngon keunyataan
Tan keu raguan, di dalam hati

'Oh noe loen saweu, saleum keu rakan
Mudah-mudahan, balasan neubi
Meuah hai teungku, tan pah tulesan
Maklum loen tuwan, baro meu rawi

Karya: Cek Wandy