INGAT KEU TUHAN

Assalamu'alaikum, saleum lam rampoe
Tanda lon pakoe, rakan syedara
Ulon bi saleum, mandum beusigoe
Si beurangkaso, meusoe yang baca

Bacut lon karang, kisah lam rampoe
 Pakhok lon ungkhoe, dari oe keu a
Ingat keu tuhan, judul lon pasoe
Meunyoe keu asoe, nasehat lon ba

Cem pala ek pam, manyang that jipoe
Ji pok-pok jaroe, lam awan mega
Jipakat lawan, ngon ma kumotoe
Meusoe teuga poe, jeut cok juara

Teu ingat jih tan, wate ban jipoe
'Oh rot meutampoe, baro jirasa
Meunan tamselan, contoh lon pasoe
Neupike keudroe, wahe syedara

Peureule parang, 'oh koh bak panjoe
Sibok mita goe, bak utoh bara
Ingat keu tuhan, 'oh wate seungkoe
Dua blah jaroe, do'a ta pinta

'Oh saket badan, su'um ngon asoe
Bak tuhan sidroe, ta lake teuga
'Oh puleh badan, ka mangat asoe
Keu tuhan sidroe, teuwoe bin lupa

Pajan chiet pajan, teu ingat sigoe
'Oh ka meupaloe, deungon binasa
Baro teubayang, keu tuhan sidroe
Malam ngon uroe, taroe ie mata

Contoh di ureung, ulon kheun sidroe
Di dalam nanggroe, peugot usaha
Geu sewa neuheun, udeung geupasoe
Muloh ngon sungkoe, na geupeulara

Tiep-tiep peut beuleun, geu panen sigoe
Hasil geu publoe, meureumpok laba
Muloh ngon udeung, yum jibloe kiloe
Sigoe geu publoe, laba meujuta

'Oh geu peutren yum, modal geu pasoe
Pena bak jaroe, kira keumira
Keu sewa neuheun, geu kira sigoe
Bayeu seuleusoe, teunaga kerja

Habeh geu hitung, pangkai geu pasoe
Tinggai lam jaroe, mandum keu laba
'Oh ban geu bileung, ngon kalkulatoe
Laba lam jaroe, troh siploh juta

Sambong-meunyambong, udeung geupasoe
Sampe troh sampoe, panen jiteuka
Raseuki neuheun, lagenyan bagoe
Sampe troh peut goe, meutai-tai laba

Keuneuleuh neuheun, nibak limong goe
Kehendak bak poe, ie raya teuka
Beureutoh ateung, neuheun peut sagoe
Udeung ngon sungkoe, ka ie raya ba

Ureung poe neuheun, meungamok sidroe
Kata yang kutoe, jitubiet sigra
Langsong ju geu kheun, kabeh dum rugoe
Rap saboh moto, merek avanza

Geu duek bak ateung, geu leung ngon jaroe
Bak tuhan sidroe, do'a geu pinta
Do'a yang geu kheun, sunggoh meu awoe
Pulang ju keu poe, tuhan yang esa

Lagenyan neuheun, han ek kupakoe
Han ek ku hiroe, dalam ie raya
Han ek le kutueng, lagenyan bagoe
Bah jinoe kuwoe, urumoh gisa

Kisah meu neuheun, ureung nyan bagoe
Bit keubit paloe, lagenyan cara,
'Oh panen udeung, mandum ka teuwoe
Keu tuhan sidroe, malah ka lupa

Jakeut geu peutheun, deungon geu iem droe
Hana geupakoe, yang gasien papa
Aneuk yatim dum, rata jeut sagoe
Tan na meusigoe, seudeukah geuba

Yang na tupue kheun, 'oh neuheun buchoe
Neubi allah poe, bek troh ie raya
Nyo panen udeung, hana deuh sahoe
Seungap teu iem droe, hana troh haba

Meunan peukateun, wahai aduen droe
Mubek na sidroe, yang ikot cara
Geutanyoe mandum, udep lam nanggroe
Allah sidroe poe, yang mat kuasa

Ingat keu tuhan, rakan sinaroe
Malam ngon uroe, bek sagai lupa
Teumpat singgahan, sinoe lam nanggroe
Mandum teuh tawoe, u alam baqa

Beuna amalan, keu pangkai tawoe
Ta peu siap droe, wate ta gisa
Nyo tan amalan, keubit that rugoe
Baro phon tawoe, ka keunong nuga

'Oh noe hai rakan, kisah lam rampoe
Bah laen uroe, ta sambong haba
Meuah lon tuan, nyo salah asoe
Kadang meu gawoe, bak tuleh rika.

Karya: Cek Wandy